Brunaæfing í dag
22.11.2018
Opnun Eldvarnaátaksins fór fram í Lækjarskóla í dag 22. nóvember. Formaður LSS opnaði átakið með stuttu ávarpi og Rósa Guðbjartsdóttir bæjarstjóri ásamt slökkviliðsmanni fræddu börnin í 3. bekk um eldvarnir. Svo fór brunakerfið í gang og skólinn var rýmdur samkvæmt áætlun. Börnin fóru út í skóm og úlpum enda aðeins um æfingu að ræða. Nemendur og starfsmenn fóru á sinn stað á söfnunarsvæði og gengið var úr skugga um að allir hefðu komist út. Til að gera æfinguna raunverulegri var ákveðið að ,,bjarga" skólastjóranum út um svalir á annarri hæð. Slökkvilið höfuðborgarsvæðisins kom á staðinn eins og um alvöru útkall væri að ræða. Reykkafarar fóru inn og björguðu Örnu skólastjóra með körfu af svölunum. Að þessu loknu var starfsfólki boðið að spreyta sig á að slökkva eld með slökkvitæki. Nemendur í 3. bekk fengu að skoða dælubíl og sjúkrabíl SHS.