Kvennafrídagur
Kvennafrídagurinn er í dag mánudaginn 24. október og viljum við hjá Hafnarfjarðarbæ leggja okkar af mörkum og hvetja okkar konur til þátttöku. Ákveðið hefur verið að gefa konum starfandi hjá Hafnarfjarðarbæ frí frá kl. 14:30 þennan dag og gefa þeim þannig kost á þátttöku í skipulögðum hátíðarhöldum á sjálfan Kvennafrídaginn.
Leik- og grunnskólahald og starfsemi frístunaheimila leggst niður. Foreldrar eru vinsamlega beðnir um að gera ráðstafanir og sækja börnin sín í síðasta lagi kl. 14:15 mánudaginn 24. október. Á þetta við um bæði skólastigin og öll frístundaheimili á vegum bæjarins. Engin starfsemi verður í félagsmiðstöðinni Vitanum þennan dag.
Kvennafrídagurinn var haldinn í fyrsta sinn á Íslandi 24. október árið 1975. Íslenskar konur komu saman á fundum um land allt en sá fjölmennasti var á Lækjartorgi í Reykjavík og vakti samstaða íslenskra kvenna heimsathygli. Langflestar konur lögðu niður störf þennan dag og lamaðist atvinnulífið í landinu að mestu leyti. Dagurinn er ekki lögbundinn frídagur en er þó ávallt kallaður kvennafrídagurinn.
Við þökkum sýndan skilning og vonumst til þess að allar konur taki virkan þátt.
Með bestu kveðju,
Haraldur Haraldsson, skólastjóri.
